17/11/2011
軼賢開學就嚟3個月，
學校安排咗第一次觀課日，
軼賢知道mami會陪佢返學不知幾期待同興奮~
前一晚已經問定mami係咪明天唔駛返工吖?
今日軼賢好快手咁食完午飯喇!
連爸爸都未見過嘅，軼賢冬季校服look~
因為要排第一。。。
所以好心急一早帶mami落去排隊等校車嚟~
話比佢知影吓相比爸爸睇喇!
立即笑晒口~
返學已經有一段時間喇!
今日主要都係老師匯報學校情況，
參觀學生在校會學d乜嘢，
自理能力有無改善，
學習會用咩書本教學生
茶點時間
高年班師兄幫手做廚師
小師妹就掛住食
最估唔到就係今日開始要做工課喇!
因為之前校友家長都話要K2先開始有工課
估唔到今年K1就開始要做喇!
做好了工課後，再去畫圖畫，
跟住老師就叫軼賢可以自由選擇自己想玩嘅地方,
軼賢更係揀咗玩玩具喇!
玩完一輪，老師叫軼賢幫忙執拾玩具，
老師叫到，軼賢更係好樂意幫手喇!
今天觀課後了解學校多咗
又同了軼賢嘅班主任傾咗軼賢嘅情況~
希望軼賢樣樣事慢慢會改善得好d喇!
放學後軼賢知道今日有家課做
一返到屋企，軼賢第一時間換完校服
立即拿工課出嚟做吖!
希望佢養成呢個良好習慣，
嚟緊每天的家課喺我地放工返嚟之前做晒就very good喇!
近排細佬b好扭計
每逢星期日都瞓得好少，
由朝到晚加埋都瞓唔2個鐘
唔瞓唔緊要，仲要一日抱到黑
總之一放低就喊~
結果由早到晚都要抱住佢
真係手都軟埋
近排又鍾意食手指
唔比佢食左手，佢會立即另轉食右手，(諗都唔駛諗)
真係比佢激c吖!
若然再禁止佢食手就會發晒皮四喊到拆天
要安撫好耐先肯收聲~
所以唔好以為細佬b咁細個就無皮氣吖!
12/11/11
星期六mami放假,
爸爸唔得閒
好在有TT姐姐睇住細佬b
mami就可以同軼賢兩母女二人世界喇~
下午同軼賢食完晏,
經過遊樂場
軼賢話想去玩吖!
係喎諗返吓!
軼賢自從返學後真係好耐無去遊樂場玩喇!
覺得依家d小朋友真係好辛苦
成日玩唔夠，瞓唔夠，
真係唔想佢地咁辛苦
所以mami一定唔會加入虎媽行列。
無錯係生日飯，
因為我的朋友們忙吖嗎~
所以咪攪到11月先食囉!
講開book位食飯！尤其係星期五
多數都好麻煩，
唔係fully book就係要分兩輪
得一個半鐘，等吓人點已經唔駛食喇!
所以哩晚試咗間新野
唔full又好坐又好食又唔駛比人趕~ 爽呀!
我同爸爸依家都盡量在晚餐時食少d~
但係, 哩晚就放恃咗
一晚咁多喇!
同朋友傾開仔女經，
大家傾到唔願走，
開心無比
我的兩位好朋友~
upload 到, 相片出唔到
12/11/2011
好耐無寫軼賢成長紀錄喇!
返咗學嘅軼賢係乖咗嘅
但係近排d情緒好飄忽
先講吓行為上
自從細佬b出世
軼賢一直都肯瞓自己間房
但近排又是唔肯自己瞓
一定要我地陪瞓
又或者直頭走堆入主人房要同我地一齊瞓，
軼賢越大越無安全感
但係近排軼賢真係好黏身，又喊多咗
事無大小都用喊嚟要脅，
仲有坐坐吓係喥睇電視
又會用哀求嘅語氣同mami講
mami您陪我喇! mami您陪我喇!
講N咁多次。講到您陪佢唯止。
好似好慘咁~
仲要樣樣以佢為先
連夜晚餐奶都話要佢飲先~
就算細佬支奶開咗都唔可以飲住
要佢飲先，如果唔係
又喊餐飽。
仲有又成日要人抱佢
每次mami或者係爸爸抱住細佬
佢就要我地抱埋佢一份，
近排嫲嫲屋企部lift要維修兩個月
每日都要將細佬連人帶車抬上抬落
篇篇係呢個時候，軼賢又要搵人抱埋一份
大少姐，唔好玩喇!
爸爸抱佢，mami又唔夠力抬bb車
mami抱軼賢又驚兩個一齊變滾地葫蘆~
有時一話唔抱就會發晒爛渣
又時又會好淒涼咁叫~
爸爸您抱我喇! 爸爸您抱我喇!
叫得咁可憐，爸爸又點會唔抱佢吖~
最緊要係唔想比軼賢以為有咗細佬b之後會唔錫佢
所以我地好多時都唯有就範~
其實都唔咁樣做正唔正確嫁?
總之唔想軼賢唔開心
以為樣樣以細佬b為先~
但又因為咁，軼賢又開始越來越野蠻~
唔通我地真係冷落咗佢
定又好似人地話齋，想爭寵~
真係唔知點好~
大家有無好嘅方法提供呢?
有好多人問過我
我今次要第二個，係咪因為追仔喎~
呢個問題，應該點講呢~
第一個係女，第二個係仔
當然開心喇!
但係如果今次都係生女，我都唔會再生第三名喎~
最主要係想軼賢有個細佬妹做伴遮~
其實生小朋友呢樣野真係好講緣份嫁
唔係您話要就要有~
因為依家好多夫婦都係check晒樣樣正常，
咪一樣等好耐都無消息
仲有好多好年輕嘅媽媽又急於做人工受孕喎~
所以有咗就已經係好幸運喇!
仲講話揀生仔定生女咩~
努力中嘅爸爸媽媽一定明白個中感受
希望一眾等緊好消息嘅爸媽繼續努力!加油!加油!
快d Bingo喇!
30 /10/2011
Sheldon細佬5個月大喇，
今個月無去磅豬仔
我估佢有18-20磅啦!
飲奶情況
由三個鐘食一次，
改為每四個鐘食一次, 180 ml
瞓覺情況
瞓覺時間亂晒
跟埋軼賢一齊夜瞓咗
由11:30pm瞓到第二朝8點幾
依家瞓醒會依依air air叫
比人知佢起咗身~
一入去同佢講嘢
就會好開心撐手撐腳~笑笑笑,
細佬B近排無瞓咁多嗰覺，
姐姐話細佬平時瞓到好多個鐘先起身飲奶
但係mami爸爸湊嘅時候又無咁好瞓喎~
點解呢?
但係近排細佬又喊多咗
又成日要人抱
唔止要抱，但要係行住嚟抱
唔準坐喺喥
都唔知幾時變成咁嫁
依家有成十幾廿磅嘅細佬B
真係抱到我地手都軟埋吖~
唯有當佢係“吽”牙仔所以咁忟憎喇!
不過Sheldon 係一個超級爛玩豬嚟嫁~
一知有人望住佢，就會撩人同佢玩
尤其喺見到軼賢家姐，會笑得好開心嫁~
Sheldon 都可以叫做開心BB
未識反身時又驚佢有問題
都佢識反身時，又驚佢焗親
因為佢依家一日到黑到都想趴係處~
反到身，抬起個頭時以為自己好叻
會開心咁笑晒~
最驚就係夜晚，次次望佢都係趴喺喥瞓
真係比佢嚇C吖~
咁又係，終於唔駛爭係望住個天花板喇!
開始比佢學吓坐喺喥
起初都係坐唔穩
坐坐吓會對摺嫁
但係一坐到時
細佬b會開心都呢~
聽到bb嘅笑聲咩煩惱都無晒~
期待下個月半歲Sheldon會識多d嘢喇!
